14 лютага ў Каталіцкім Касцёле распачаўся Вялікі пост, і каталіцкая моладзь з Навагрудка (Гродзенская дыяцэзія) творча падышла да духоўнага вымярэння гэтага асаблівага літургічнага перыяду, прысвечанага пакаянню і навяртанню, а таксама малітоўнаму перажыванню Мукі Хрыста.
Моладзевы гурт Veni з навагрудскай парафіі святога Арханёла Міхала запісаў музычнае разважанне на Вялікі пост.
Натхніла на стварэнне відэкліпу многім вядомая велікапосная песня, якой маладыя людзі захацелі надаць больш увагі, выканаўшы яе ў сваёй аўтарскай аранжыроўцы.
Ідэя такой творчай працы была ўжо даўно, і з Божай дапамогай яна была рэалізавана. Маладыя музыкі спадзяюцца, што гэты спеў-разважанне ў іх выкананні дапаможа вернікам увайсці ў асаблівую духоўную атмасферу важнага літургічнага перыяду, якім з’яўляецца Вялікі пост.
