28 студзеня вернікі парафіі святога Казіміра ў Маладзечне (Мінска-Магілёўская архідыяцэзія) наведалі падапечных мясцовага псіханеўралагічнага дома-інтэрната для састарэлых і інвалідаў.
Сайт парафіі Pio.by паведамляе, што для валанцёраў Caritas і Францішканскай моладзі «Таў» мерапрыемства распачалося са святой Імшы ў касцёле святога айца Піо. Атрымаўшы благаслаўленне, яны скіраваліся ў Маладзечанскі дом-інтэрнат для састарэлых і інвалідаў. Наведванне гэтай установы ўжо стала добрай традыцыяй для парафіі.
Сустрэча распачалася з супольнай малітвы «Ойча Наш», якая прагучала на розных мовах і стала сведчаннем таго, што людзі розныя, і моваў шмат, але ўсе хрысціяне ўзносяць хвалу аднаму Нябеснаму Айцу.
Святочная праграма складалася з загадак пра Бога і Божае Нараджэнне, танцаў і разнастайных конкурсаў, якія падрыхтавалі валанцёры Caritas разам з францішкаскай моладзю.
Падапечныя дома-інтэрната таксама прадэманстравалі свае таленты ігрой на фартэпіяна, спевамі і вершамі, якія былі прысвечаны валанцёрам.
Напрыканцы сустрэчы жыхароў установы чакаў салодкі стол. Кожны атрымаў падарунак, станоўчыя эмоцыі і добры настрой.
