19 студзеня ў Гродзенскім абласным клінічным перынатальным цэнтры адбылася падзея, якую супрацоўнікі гэтай установы па традыцыі чакаюць у перыяд святаў Божага Нараджэння і Новага года.
Як паведамляе сайт цэнтра, пробашч гродзенскай катэдры святога Францішка Ксавэрыя ксёндз канонік Ян Кучынскі і настаяцель праваслаўнай Каложскай царквы ў Гродне протаіерэй Аляксандр Балоннікаў благаславілі аперацыйныя, радзільныя залы, аддзяленні ўстановы і пажадалі плённай працы, шчасця і ўзаемапавагі ў сем’ях, міласэрнасці, спачування і цярплівасці, а таксама правялі набажэнства для супрацоўнікаў і пацыентаў.
Пасля супольнай малітвы атрымалі благаслаўленне супрацоўнікі перынатальнага цэнтра, пацыенткі аддзяленняў, цяжарныя жанчыны, мамы з дзецьмі, парадзіхі ў радавых блоках.
