Вернікі парафіі святога Яна Евангеліста і святога Максімільяна Кольбэ ў Мінску ўзялі ўдзел у дабрачыннай акцыі «Стань святым Мікалаем», якая была прымеркавана да Божага Нараджэння.
У святочны дзень сабраныя сталічнымі парафіянамі падарункі святы Мікалай раздаў дзецям парафіі святога апостала Тамаша і святога Яна Боско ў вёсцы Мішкавічы Шумілінскага раёна (Віцебская дыяцэзія, Віцебскі дэканат). Маленькія вернікі вельмі радаваліся нечаканаму сюрпрызу і скіравалі падзяку тым, хто яго для іх падрыхтаваў.
«Ад імя дзяцей і іх бацькоў шчыра дзякуем за дар вашых сэрцаў, за вашыя намаганні, каб сабраць падарункі <…>. Перадусім шчыра дзякуем за малітву ў інтэнцыі гэтых дзяцей і іх сем’яў, якая вельмі патрэбная, асабліва іх бацькам, якія ў большасці знаходзяцца на дарозе пошукаў Бога ў сваім жыцці. <…>
Дзеці ўсведамляюць, што святы Мікалай дзякуючы вам меў гэтыя падарункі. Яны здзівіліся, што вы проста падзяліліся сваімі шчырымі сэрцамі, падзяліліся любоўю. І мы спадзяемся, што дзеці і моладзь, беручы ў рукі тое, што атрымалі ад вас, узгадаюць вас у сваіх шчырых малітвах, выпрошваючы для вас патрэбныя ласкі», — напісана ў лісце з Мішкавічаў, апублікаваным на сайце парафіі святога Яна Евангеліста і святога Максімільяна Кольбэ ў Мінску Jan.by. Асаблівая падзяка ў лісце выказваецца ксяндзам хрыстусоўцам, якія нясуць служэнне ў парафіі святога Яна Евангеліста і святога Максімільяна Кольбэ ў Мінску, і моладзі за арганізацыю і намаганні па зборы і перадачы падарункаў мішкавіцкім дзецям.
