21 снежня ў Міждыяцэзіяльнай вышэйшай духоўнай семінарыі ў Гродне прайшла традыцыйная вігілійная сустрэча перад Божым Нараджэннем.
Падчас сустрэчы семінарысты, выкладчыкі, адказныя за фармацыю будучых святароў спявалі калядкі, дзяліліся аплаткай і сабраліся за супольным вігілійным сталом.
Да семінарыйнай супольнасці ў гэты вечар далучыўся Вялікі канцлер семінарыі біскуп Гродзенскі Аляксандр Кашкевіч і адзін з асаблівых выпускнікоў: Мітрапаліт Мінска-Магілёўскі арцыбіскуп Юзаф Станеўскі, які пэўны час таксама быў рэктарам гэтай духоўнай навучальнай установы, сёння — адзінай дзеючай каталіцкай семінарыі ў Беларусі.
Як адзначаецца на старонцы Міждыяцэзіяльнай семінарыі ў сацыяльнай сетцы Instagram vdsgrodna, аплаткавая сустрэча семінарыйнай супольнасці стала момантам, каб падвесці вынікі мінулага каляндарнага і літургічнага года, падзяліцца аплаткай, папрасіць прабачэння і пажадаць найлепшага перажывання надыходзячага Божага Нараджэння.
Пасля вігілійнай сустрэчы семінарысты скіраваліся на калядныя святы ў свае парафіі.
