27 жніўня група вернікаў парафіі святога Казіміра ў Маладзечне (Мінска-Магілёўская архідыяцэзія) наведала пастаяльцаў псіханеўралагічнага дома-інтэрната горада, з якімі іх звязваюць даўнія сяброўскія адносіны.
У апошнюю нядзелю лета валанцёры парафіяльнага Caritas разам з братам Уладзіславам Мінько OFMCap, сястрой Аляксандрай Рыбалтоўскай MSF, супольнасцю францішканскай моладзі Таў і дзіцячым хорам «Зярняткі» пад кіраўніцтвам Ірэны Туровіч у чарговы раз завіталі ў інтэрнат да сваіх сяброў з музычнай і танцавальнай праграмай.
Падчас сустрэчы свае таленты паказалі і пастаяльцы. Яны спявалі і танчылі.
Жанна, якая ўжо доўгі час знаходзіцца ў доме-інтэрнаце, вельмі любіць спяваць. У падарунак ад аднаго з валанцёраў яна атрымала музычны мікрафон. Жанна настолькі была гэтаму рада і ўдзячна, што адразу пачала спяваць. Жанчыны атрымалі ў падарунак касметыку, каб мець магчымасць яшчэ больш клапаціцца пра сваю прыгажосць. Акрамя таго, валанцёры парафіяльнага Caritas пачаставалі пастаяльцаў смачным кавуном.
На двары стаяла цудоўнае надвор’е, а ва ўдзельнікаў сустрэчы панаваў добры настрой.
Усе дзяліліся цеплынёй свайго сэрца праз танцы, спевы, размовы, усмешкі і абдымкі.
