У чэрвені ў цэнтры Дабрачыннага каталіцкага таварыства Caritas Мінска-Магілёўскай архідыяцэзіі ў Ляскоўцы, што пад Мінскам, прайшоў трохдзённы адпачынак для людзей з абмежаванымі магчымасцямі.
Пра гэта паведамляецца на старонцы Caritas-Мінск у сацыяльнай сетцы Вк.
Супрацоўнікі і валанцёры правялі для сваіх гасцей канцэрт жывой музыкі, гульні, шпацыр, масаж, пікнік на свежым паветры і прапанавалі ім шмат іншых актыўнасцяў.
Усяго на тэрыторыі цэнтра змаглі правесці тры дні адпачынку 12 гасцей.
Для падапечных дабрачыннага каталіцкага таварыства такія сустрэчы — асаблівая магчымасць завесці новыя знаёмствы, атрымаць новы досвед і проста добра пабавіць час у прыемнай кампаніі.
Caritas-Мінск і ўсе госці цэнтра ўдзячныя партнёрам і сябрам за праведзены разам час. Мерапрыемства наведалі прадстаўнікі Пасольства Славацкай Рэспублікі ў Мінску на чале з пані Катарынай Жакавай.
Асаблівая ўдзячнасць скіравана таксама ахвярадаўцам і валанцёрам, якія сваёй падтрымкай робяць сапраўдны падарунак для людзей з інваліднасцю.
