10 чэрвеня група руху «Маці ў малітве», якая ўжо чатыры гады дзейнічае пры парафіі Божай Міласэрнасці ў Гродне (Вішнявец), здзейсніла супольную пілігрымку, падчас якой наведала шэраг святынь Гродзенскай дыяцэзіі.
Напярэдадні чацвёртай гадавіны з часу заснавання гэтай парафіяльнай малітоўнай групы, яе ўдзельніцы разам са сваімі сем’ямі сабраліся на святую Імшу, каб выказаць удзячнасць Пану Богу і Найсвяцейшай Марыі Панне за дар, якім з’яўляецца мацярынства і сямейнае жыццё.
Штогод з нагоды гадавіны з’яўлення групы маці збіраюцца, каб разам памаліцца, перажыць асабісты дзень засяроджання, пілігрымаваць, наведаць цікавыя мясціны.
Так, у першую гадавіну ўдзельніцы наведалі санктуарый Маці Божай Цярпліва Слухаючай на ўзгорку Надзеі ў Капцёўцы, што каля Гродна, а ў другую пілігрымавалі ва Уселюб, што на Навагрудчыне, да Маці Божай Новага Жыцця, дзе правялі тры дні ў супольнай малітве. Трэцюю гадавіну летась адзначылі ў санктуарыі Гродзенскай дыяцэзіі Маці Божай Тракельскай, Каралевы нашых Сем’яў.
Сёлета парафіяльная група «Маці ў малітве» разам са сваім духоўным кіраўніком ксяндзом Валерыем Пупкевічам SCJ напачатку наведала парафію Маці Божай Нястомнай Дапамогі ў Карэлічах (Навагрудскі дэканат). Там мясцовы пробашч айцец Юрый Саковіч з манаскай супольнасці святога Паўла, першага пустэльніка, пазнаёміў з гісторыяй парафіі, а потым адбылася святая Імша, гамілію на якой прамовіў айцец Юрый. Ён распавёў госцям з Гродна пра святую Ружу Лімскую, рэліквіі якой захоўваюцца ў карэліцкім касцёле.
Наступным пунктам пілігрымкі стаў Навагрудак, дзе ўдзельніцы памаліліся перад рэліквіямі сясцёр назарэтанак, мучаніц Другой сусветнай вайны, а таксама наведалі месца іх мучаніцкай смерці.
Завяршылася пілігрымка ў чацвёртую гадавіну з часу заснавання групы ў парафіі святога Казіміра ва Уселюбе, дзе гродзенскіх падарожніц мясцовыя вернікі разам са сваім пробашчам ксяндзом Віталіем Цыбульскім пачаставалі абедам. Пасля супольнага ўдзелу ў набажэнстве Крыжовага шляху ўдзельніцы парафіяльнай групы руху «Маці ў Малітве» духоўна ўзбагачанымі вярнуліся ў Гродна.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)