13 мая, у 106-ю гадавіну з часу першага аб’яўлення Маці Божай у Фаціме, у Кангрэгацыі Святароў Найсвяцейшага Сэрца Езуса (сэрцане) адбылася ўрачыстасць удзялення сакрамэнту пасвячэння.
У гэты дзень у прысемінарыйнай парафіі ў Стадніках (Польшча) з рук ардынарыя Саснавецкай дыяцэзіі біскупа Гжэгажа Кашака сакрамэнт пасвячэння ў ступені прэзбітэрату прынялі трое дыяканаў, а яшчэ пяцёра законнікаў — у ступені дыяканату.
У тым ліку дыяканам стаў наш зямляк Аляксандр Пятліцкі SCI з Баранавічаў (Пінская дыяцэзія, парафія Узвышэння Святога Крыжа).
У прамоўленай гаміліі біскуп Кашак заахвоціў кандыдатаў да пасвячэння, каб перадусім дзейнічалі ў духу служэння Богу і братам, узрасталі ў гэтым духу і не імкнуліся быць «рэлігійнымі мэнэджэрамі».
Ва ўрачыстасці пасвячэння ўзялі ўдзел родныя дыякана Аляксандра з Беларусі, а таксама святары з супольнасці, якія цяпер нясуць служэнне ў нашай краіне.
Дыякан Аляксандр Пятліцкі SCI нарадзіўся ў 1991 годзе ў Баранавічах (Пінская дыяцэзія). Жыццё, прысвечанае службе Богу, ён распачаў першымі манаскімі абяцаннямі ў 2018 годзе у Стапніцы (Польша), дзе знаходзіцца навіцыят польскай Правінцыі супольнасці сэрцанаў.
27 снежня 2022 года ў Гродне прынёс вечныя манаскія абяцанні.
На працягу настунага года будзе працягваць тэалагічную адукацыю у Стадніках (Польша), якая павінна завяршыцца абаронай магістарскай працы і прыняццем сакраманту пасвячэння ў ступені прэзбітэра.
