4 красавіка ў Гродне з нагоды набліжэння ўрачыстасці Уваскрасення Пана адбыўся абед для маламаёмных і людзей без пэўнага месца жыхарства.
Як паведаміла Прэс-служба Гродзенскай дыяцэзіі, традыцыйны ўжо перадсвяточны абед прыгатавалі сёстры з Кангрэгацыі Найсвяцейшай Сям’і з Назарэта (назарэтанкі) разам з валанцёрамі пры падтрымцы Дабрачыннага каталіцкага таварыства Caritas Гродзенскай дыяцэзіі.
Пасілак благаславіў біскуп Гродзенскі Аляксандр Кашкевіч.
Сёлета ў сустрэчы ўдзельнічала каля 200 чалавек.
Час і радасць пры супольным стале падзялілі з беднымі віцэ-канцлер Гродзенскай курыі ксёндз канонік Антоній Грэмза і прэс-сакратар Гродзенскай дыяцэзіі ксёндз канонік Юрый Марціновіч.
Прысутныя ўсе разам прамовілі малітву, якой навучыў Езус Хрыстус. У ёй яны прасілі Бога найперш аб удзяленні кожнаму з іх неабходных ласкаў.
Ксёндз Юрый Марціновіч патлумачыў значэнне Вялікага тыдня. Святар падкрэсліў, што для хрысціянаў гэта павінен быць найважнейшы ў годзе час, бо з Пальмовай нядзелі да нядзелі Уваскрасення Касцёл узгадвае самыя важныя падзеі гісторыі збаўлення: устанаўленне Эўхарыстыі, Муку і Смерць Хрыста і, нарэшце, Яго Уваскрасенне.
Біскуп Кашкевіч, звяртаючыся да прысутных, адзначыў, што пасля Вялікай пятніцы прыйдзе ранак Уваскрасення, у сувязі з чым дадаў, што любоў мацнейшая за нянавісць, а дабро заўсёды перамагае зло.
Пастыр Касцёла на Гродзеншчыне пажадаў удзельнікам сустрэчы перш за ўсё хрысціянскай надзеі на лепшае заўтра, пажадаў глядзець у будучыню з надзеяй, а таксама адкрыцца на дар Хрыстовага Уваскрасення, якое прыносіць чалавеку радасць і мір.
На тварах сабраных сапраўды было відаць радасць.
Яны цешыліся, як дзеці, атрымліваючы з рук сясцёр назарэтанак велікодныя яйкі.
Вельмі шмат словаў удзячнасці з вуснаў бедных прагучала ў адрас законніц і валанцёраў, якія гатуюць для іх цёплыя пасілкі не толькі на святы, але і на працягу ўсяго года.
