25 і 26 сакавіка ў грэка-каталіцкай парафіі ў Полацку праводзіліся Дні ўдзячнасці за Божае слова.
Як паведамляецца на сайце грэка-катлаліцкай парафіі святога праведнага Язэпа ў Мінску Svjazep.org, у суботу 25 сакавіка, ва ўрачыстасць Звеставання Пана, Боскую Літургію ў полацкім парафіяльным храме ўзначаліў протапрэзбітар Аляксандр Шаўцоў.
У прамоўленай гаміліі Апостальскі візітатар для беларускіх грэка-католікаў архімандрыт Сяргей Гаек звярнуў увагу прысутных вернікаў на асаблівы «духоўны феномен» горада Полацка, у якім Божае слова гучала ўжо ў тыя часы, калі Цэрквы Усходу і Захаду былі ў еднасці.
Архімандрыт Гаек заахвоціў вернікаў да падзякі Богу за подзвіг усіх перакладчыкаў і выдаўцоў розных канфесій, якія, пачынаючы з Францішка Скарыны, клапаціліся пра тое, каб на беларускіх землях Божае слова дайшло да шырокіх колаў людзей.
У нядзелю 26 сакавіка праграма малітвы падзякі працягвалася. Пасля Боскай Літургіі семінарыст Цігран Латышаў перадаў вернікам падарунак ад братоў пратэстантаў з Кобрына: ілюстраваную кнігу-комікс біблейскіх гісторый на расейскай мове «Добро и зло».
Кнігу атрымала таксама моладзь з рыма-каталіцкай парафіі святога Андрэя Баболі ў Полацку.
Арганізатары Дзён падзякі спадзяюцца, што яе змест дойдзе і да сэрцаў чытачоў.
