19 сакавіка ў парафіі святога Юзафа ў Рубяжэвічах (Мінска-Магілёўская архідыяцэзія, Стаўбцоўскі дэканат) адзначылі парафіяльны адпуст у гонар Абранніка Найсвяцейшай Панны Марыі і Апякуна паўсюднага Касцёла.
З гэтай нагоды парафію ў Рубяжэвічах наведаў Мітрапаліт Мінска-Магілёўскі арцыбіскуп Юзаф Станеўскі, які ва ўрачыстасць святога Юзафа святкуе свае імяніны.
Арцыпастыра гасцінна сустрэлі і цёпла прывіталі рубяжэвіцкія парафіяне на чале са сваім пробашчам ксяндзом канонікам Уладзімірам Каспарэвічам.
Незадоўга да парафіяльнага свята ў рубяжэвіцкую святыню прыбылі копіі цудадзейных абразоў Маці Божай, які здзяйсняюць перэгрынацыю па парафіях Мінска-Магілёўскай архідыяцэзіі.
Яны дапамаглі стварыць асаблівую малітоўную атмасферу і адчуць прысутнасць Багародзіцы ў Яе святых выявах.
У прамоўленай гаміліі арцыбіскуп Станеўскі звярнуў увагу на асобу святога Юзафа, узгадаўшы, з якімі цяжкасцямі і выпрабаваннямі яму давялося сутыкнуцца, каб выканаць даручанае яму Богам заданне стаць галавой Святой Сям’і.
«Ён учыніў сваё жыццё даверам Пану Богу», — падкрэсліў іерарх.
Арцыпастыр перасцярог вернікаў ад памылковага празмернага спадзявання на ўласныя сілы, ад спакусы самім справіцца з усімі цяжкасцямі. Іерарх заахвоціў прысутных звяртацца да Божай дапамогі і па прыкладу святога Юзафа, які на старонках Святога Пісання не прамовіў ніводнага слова, а толькі слухаў, уважліва прыслухоўвацца да таго, што Бог хоча сказаць, асабліва моладым людзям.
«Бог, які стварыў неба і зямлю, прамаўляе так, як калісьці да Юзафа: „Не бойся, Я з табою!“
Дарагія брат і сястра, кожны з нас — Божае стварэнне. Таму не бойцеся сённяшняга свету і будзьце мужнымі», — заахвоціў арцыбіскуп Станеўскі напрыканцы гаміліі.
Пасля Імшы парафіяне павіншавалі іерарха з імянінамі, пажадаўшы яму моцнага здароўя, а таксама апекі святога Юзафа і Найсвяцейшай Панны Марыі ў пастырскай працы. Арцыбіскуп, у сваю чаргу, падзякаваў усім вернікам і пробашчу за клопат пра святыню і пажадаў, каб жылі ў любові і еднасці ў духу Евангелля.
«Не бойцеся! Трымайцеся моцна крыжа, бо на ім ёсць Езус Хрыстус, і Ён дапаможа пераадолець нам усе цяжкасці», — сказаў на развітанне гасцінным рубяжэвіцкім вернікам арцыбіскуп Юзаф Станеўскі.
