1 сакавіка Апостальскі нунцый у Рэспубліцы Беларусь арцыбіскуп Антэ Ёзіч скіраваў Мітрапаліту Мінска-Магілёўскаму спачуванні ў сувязі са смерцю ксяндза каноніка Дзмітрыя Барылы, пробашча парафіі Маці Божай Ружанцовай і святога Дамініка ў Ракаве, былога афіцыяла Міждыяцэзіяльнага трыбунала ў Мінску.
Прадстаўнік Папы Францішка ў нашай краіне піша, што «са смуткам даведаўся пра заканчэнне зямнога шляху ксяндза каноніка Дзмітрыя Барылы».
«Прагну выказаць Вам шчырыя спачуванні і запэўніць у маёй гарачай малітве да ўсемагутнага і міласэрнага Бога, служэнню якому ксёндз Дзмітрый ахвярна і верна прысвячціў сваё жыццё, за супакой душы спачылага святара. Няхай Найсвяцейшая Панна Марыя сустрэне яго на парозе Дома Спрадвечнага Айца і ўвядзе на гасціну збаўленых.
Прашу Вас таксама пераказаць шчырыя словы спачування і падтрымкі для маці і родных ксяндза Дзмітрыя, да якіх далучаюцца ўсе супрацоўнікі Апостальскай Нунцыятуры ў Мінску», — напісаў арцыбіскупу Станеўскаму Апостальскі нунцый Антэ Ёзіч.
Спачылы ксёндз Дзмітрый Барыла браў удзел у дзейнасці працоўнай групы па падрыхтоўцы перакладу на беларускую мову Кодэкса кананічнага права, што праходзіла па ініцыятыве і пад патранатам нунцыя Ёзіча.
