У суботу 18 лютага ў парафіі святога Міхала Арханёла ў Смаргоні (Гродзенская дыяцэзія) адбыўся дзень салезіянскай духоўнасці.
Як адзначаецца на сайце салезіянаў ксяндза Боско ў Беларусі sdb.by, дзень духоўнасці салезіяне традыцыйна адзначаюць ў лютым. Падчас яго адбываецца больш глыбокае знаёмства з дэвізам Генеральнага настаяцеля салезіянскага таварыства на распачаты год.
Сёлета ксёндз Анхэль Фэрнандэс Арцімэ SDB прапануе паразважаць над свецкім вымярэннем салезіянскай сям’і: «Быць закваскай у сучаснай чалавечай сям’і».
За падрыхтоўку і правядзенне мерапрыемства былі адказныя прадстаўнікі трэцяй галіны салезіянскай сям’і — салезіяне супрацоўнікі, якія дзейнічаюць пры смаргонскай парафіі. Арганізатары прапанавалі ўдзельнікам падзяліцца па класах і наведаць заняткі ў салезіянскай школе.
Вучнямі ў класах сталі святары салезіяне, сёстры салезіянкі, салезіяне супрацоўнікі, прадстаўнікі суполкі АДМА, салезіянскія аніматары і памочнікі, якія прыбылі ў Смаргонь з усёй Беларусі.
За кожным класам быў замацаваны класны кіраўнік і абраны стараста, а дырэктарам школы стаў Рэгіянальны настаяцель салезіянскага таварыства ў нашай краіне ксёндз Павел Шчарбіцкі SDB.
Пасля імправізаванага сходу ў актавай залі вучні разышліся па навучальных класах, у якіх на розных уроках падрабязна разледзелі сутнасць прапанаванага Генеральным настаяцелем дэвізу — своеасаблівай духоўнай праграмы на бліжэйшы год.
Калі заняткі скончыліся, кожны клас сабраўся для падвядзення вынікаў і распрацоўкі канкрэтнага кроку, які салезіянская сям’я можа зрабіць у гэтым годзе, абапіраючыся на дэвіз.
Напрыканцы сустрэчы дэлегат падзякаваў арганізатарам і мясцовай салезіянаскай супольнасці на чале з яе дырэктарам ксяндзом Казімірам Муравай SDB за добра падрыхтаваную сустрэчу, а таксама ўсім, хто прыехаў, і за іх актыўны ўдзел.
Ксёндз Павел таксама прамовіў традыцыйнае салезіянскае слоўка на добрую ноч. Святар адзначыў, што, «гледзячы на дэвіз і нашую рэчаіснасць, варта памятаць, што мы не індывідуалісты; што служэнне ў салезіянскай сям’і не завязана на канкрэтнай асобе. Яно скіравана на канкрэтную мэту, да якой мы ідзем усе разам, супольна.
Гэтай мэтай з’яўляецца святасць: святасць кожнага з нас асабіста і святасць той моладзі і тых людзей, дзеля якіх мы працуем», — падкрэсліў ксёндз Павел Шчарбіцкі.
Зявяршыўся дзень салезіянскай духоўнасці малітвай і супольнай вячэрай.
