15 студзеня вернікі парафіі святога Казіміра ў Маладзечне, дзе нясуць душпастырскае служэнне Меншыя Браты Капуцыны, наведалі выхаванцаў Маладзечанскай санаторнай школы-інтэрната для дзяцей, хворых на скалiёз.
Групу парафіянаў суправаджалі сястра Кацярына Грынчык MSF і брат Уладзіслаў Мінько OFMCap.
Дзецям, падлеткам, а таксама іх выхаваўцам быў прадстаўлены спектакль Сяргея Кавалёва «Шлях да Бэтлеема».
Падчас сцэнкі акторы інтэрактыўна ўзаемадзейнічалі з гледачамі, задаючы ім пытанні. Было відаць, як змяняюцца эмоцыі дзяцей па меры развіцця дзеянняў у спектаклі, адчувалася іх неабыякавасць да перажывання галоўнага героя.
Для актораў з парафіі святога Казіміра гэта была не проста дабрачынная акцыя, а магчымасць падзяліцца добрай навіной; абвясціць, што кожны патрэбны Богу такім, якім Ён яго стварыў.
У кожнага чалавека свой шлях да Бога, але важна на гэтым шляху прыняць сябе, зразумець сваю годнасць у вачах Бога — менавіта такі сэнс паказанага спектакля «Шлях да Бэтлеема».
Акцыя цудоўна ўпісалася ў тэму распачатага 2023 Пастырскага года, які праходзіць пад дэвізам «Апостальства свецкіх — знак надзеі для Касцёла ў Беларусі».
Напрыканцы выступу кожны, хто хацеў, мог узяць для сябе або блізкіх маленькі, але каштоўны падарунак — Біблію.
