8 студзеня, у свята Хросту Пана, у сталічным касцёле Маці Божай Будслаўскай адбылася аплаткавая сустрэча ўдзельнікаў 30-й пешай пілігрымкі Мінск-Будслаў.
Як паведамляецца на сайце парафіі святога Яна Евангеліста і святога Макісмільяна Кольбэ ў Мінску Jan.by, пілігрымаў гасцінна сустрэў у святыні ксёндз канонік Францішак Рудзь, пробашч мінскай парафіі Маці Божай Будслаўскай, які нядаўна адзначыў свой 50-гадовы юбілей. У прывітальным слове святар адзначыў:
«Сімвалічна, што на аплаткавую сустрэчу пілігрымы сабраліся ў „кавалачку Будслава“ ў Мінску — у касцёле Маці Божай Будслаўскай».
Пасля супольнай малітвы Вяночка да Божай Міласэрнасці распачалася святая Імша ў інтэнцыі ўсіх удзельнікаў пілігрымкі, дабрачынцаў і ахвярадаўцаў. Цэлебрацыю ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
Іерарх падзякаваў Богу за магчымасць сабрацца, ксяндзам з законніцкай супольнасці хрыстусоўцаў — за арганізацыю пілігрымкі і ініцыятыву аплаткавай сустрэчы.
«Гэта вельмі добра, што мы не абмяжоўваемся аднаразовай сустрэчай у пілігрымцы, але калі мы падтрымліваем кантакты, адносіны. Прайшло ўжо паўгады, і мы можам нават падзяліцца сваімі ўражаннямі з перспектывы часу: як прайшла для мяне пілігрымка, якія плёны ёсць у маім жыцці?» — адзначыў біскуп Касабуцкі.
Завяршылася малітоўная частка сустрэчы спевам «Каралева супакою», які стаў гімнам пілігрымкі 2022 года. Пілігрымы, як і ўлетку, сабраўшыся ў кола, разам праслаўлялі Божую Маці.
Другая частка святкавання адбывалася ў дольным касцёле. Біскуп Касабуцкі благаславіў аплаткі, пасля чаго пілігрымы дзяліліся імі, віншавалі адзін аднаго са святамі і абменьваліся добрымі пажаданнямі. Гурт Jolly Green стварыў святочную атмасферу, спяваючы калядкі розных краін свету. Потым усе разам паглядзелі фільм, у якім былі сабраныя ўспаміны з пілігрымкі.
Напрыканцы сустрэчы біскуп Юрый Касабуцкі благаславіў пілігрымаў і пажадаў зноў прайсці да Маці Божай у гэтым годзе.
