Вернікі парафіі Божага Цела ў Нясвіжы разам з валанцёрамі Дабрачыннага каталіцкага таварыства Caritas і супрацоўнікамі Нясвіжскага тэрытарыяльнага цэнтра сацыяльнага абслугоўвання насельніцтва па ўласнай ініцыятыве правялі 25 снежня дабрачынную акцыю «Дапамога дзецям інвалідам са шматдзетных сем’яў».
У межах акцыі парафіяне сабралі дзецям-інвалідам падарункі, а сёстры місіянеркі Хрыста Валадара, якія нясуць служэнне пры парафіі, разам з дзецьмі, што наведваюць заняткі па катэхізацыі, падрыхтавалі тэатралізаваную сцэнку-батлейку, прысвечаную Нараджэнню Езуса Хрыста. Напрыканцы акцыі дзеткі з асаблівасцямі развіцця атрымалі магчымасць паразмаўляць са святарамі і добра правесці час за салодкім сталом.
На працягу ўсёй акцыі радасныя ўсмешкі не сыходзілі з твараў дзяцей. Як адзначыў пробашч парафіі Божага Цела ў Нясіжы ксёндз канонік Пётр Шарко, Божае Нараджэнне, якое адзначаецца ўсімі хрысціянамі як адна з найбольшых урачыстасцяў, — гэта асаблівая нагода для добрых учынкаў.
«Сын Божы прыходзіць у гэты свет і вучыць нас любіць бліжніх.
Добрыя ўчынкі, якія можа зрабіць кожны чалавек, — гэта любоў, якая аднаўляе, загойвае і будуе; гэта магчымасць змяніць наш свет да лепшага, — кажа нясвіжскі пробашч. — Шчаслівае дзяцінства павінна быць у кожнага дзяцяці, бо дзеці — вялікі скарб і каштоўнасць; дзеці — наша будучыня», — упэўнены ксёндз Пётр Шарко.
