Перад Божым Нараджэннем беларускія каталіцкія скаўты даставілі Бэтлеемскі агонь у парафію святога Сымона і святой Алены, у плябанію каля закрытага Чырвонага касцёла ў Мінску.
Святло міру, запаленае на мецы Нараджэння Хрыста ў Бэтлееме, сустрэў пробашч парафіі ксёндз канонік Уладзіслаў Завальнюк.
Святар, які ўпершыню прыняў Бэтлеемскі агонь у Мінску на Каляды 1994 года, распавёў скаўтам пра незвычайную з’яву, якая цяпер здарылася ў Чырвоным касцёле і якую некаторыя лічаць цудам.
Пасля тушэння загарання, што па не вядомых да гэтага часу прычынах узнікла ў верасні ў святыні, там у спецыяльнай лампадзе працягваў гарэць дастаўлены скаўтамі яшчэ ў мінулым годзе Бэтлеемскі агонь, які ў парафіі падтрымліваецца пастаянна. Лампада з агнём была перанесена ў плябанію. Цяпер у парафіі гараць два агні: запалены сёлета і год таму.
Па словах ксяндза Уладзіслава Завальнюка, «яны будуць гарэць так прынамсі да Грамніц».
