21 снежня ў полацкім касцёле святога Андрэя Баболі на святочную сустрэчу з дзяленнем аплаткай сабраліся святары і сёстры законныя з парафій Віцебскай дыяцэзіі на чале з біскупам Віцебскім Алегам Буткевічам.
Як паведамляецца на сайце Catholicnews.by, перадсвяточная сустрэча духавенства і кансэкраваных асоб распачалася з малітвы ў цішыні перад Езусам Эўхарыстычным, падчас якога многія скарысталі з магчымасці споведзі.
Прамаўляючы Божае слова, біскуп Буткевіч разважаў над асобай святога Юзафа і яго роляй у жыцці сучаснага святара.
«Святы Юзаф служыць прыкладам глыбокай малітвы і ўнутранага засяроджання. Папа Францішак, кажучы пра заслугі святога, падкрэслівае, што ён патрапіў кожную цяжкую сітуацыю, нават крытычную, ператварыць сабе ў шанц. Не ў нейкую трагедыю ці расчараванне ў сваім жыцці, а ў шанц. Кожная цяжкая сітуацыя, калі пазітыўна вырашаецца, становіцца шанцам для чалавека. А гэта становіцца магчымым дзякуючы паслухмянасці Божаму слову, якое тлумачыць сэнс таго, што адбываецца і паказвае дарогу, на якой выконваць гэтае заданне; слова, якое наводзіць парадак у жыцці, дапамагае не трапіць у хаос у незразумелай сітуацыі.
Праз паслухмянасць Божаму слову святы Юзаф з’яўляецца нашым прыкладам у жыцці і святарскай паслузе», — падкрэсліў біскуп Алег Буткевіч.
Пасля святой Імшы прысутныя разгледзелі надзённыя пытанні жыцця Касцёла ў дыяцэзіі.
Духоўны айцец святароў дыяцэзіі ксёндз Валерый Марціноўскі у аскетычнай канферэнцыі засяродзіў увагу прысутных на тэме духоўнасці дзіцяці ў наш час.
Святар прывёў некалькі прыкладаў параўнання «Божага дзяцінства» і інфантыльнасці ў сучасным чалавеку.
Важным момантам сустрэчы стала супольное дзяленне аплаткамі, падчас якога кожны мог асабіста выказаць іншаму віншаванні і шчырыя святочныя пажаданні.
