18 снежня ў Мінску пры парафіі Божага Цела, якой апякуюцца кармэліты босыя, адбылася аплаткавая сустрэча выкладчыкаў і навучэнцаў Школы сямейнага жыцця.
Ганаровым госцем сустрэчы стаў Мітрапаліт Мінска-Магілёўскі арцыбіскуп Юзаф Станеўскі.
Распачалася сустрэча супольнай Эўхарыстыяй у парафіяльнай капліцы. Напачатку ўсіх прысутных прывітаў дырэктар Школы сямейнага жыцця айцец Сяргей Трысцень OCD.
У прамоўленай гаміліі арцыбіскуп Станеўскі засяродзіў увагу на тым, што «кожнае чалавечае сэрца павінна быць Бэтлеемам, дзе жывуць і ззяюць спакой, радасць і дабрыня».
Пасля святой Імшы навучэнцы першага курса прадставілі ўвазе прысутных калядную батлейку, якая наблізіла духоўны змест Божага Нараджэння. Пасля прачытання Евангелля і малітвы арцыбіскуп Станеўскі скіраваў да ўсіх прысутных словы прывітання і разважання пра важнасць паклікання быць дарадчыкамі сямейнага жыцця, пабудаванага на адносінах з Богам праз веру, надзею і любоў.
Іерарх таксама благаславіў аплаткі, якімі ўдзельнікі сустрэчы падзяліліся, выказваючы адно аднаму святочныя зычэнні.
Пазней адбыўся супольны пачастунак у атмасферы перадсвяточнай радасці і братэрства.
