Прапануем вашай увазе анонс апошняга ў гэтым годзе, снежаньскага нумара часопіса «Ave Maria», апублікаваны на сайце выдання ave-maria.by.
Распачынаецца ён урыўкам інтэрв’ю рэдактара часопісаў «Ave Maria» і «Наша вера» Крыстыны Лялько з Мітрапалітам Мінска-Магілёўскім арцыбіскупам Юзафам Станеўскім «Крочыць за жывым Езусам Хрыстом…» (цалкам інтэрв’ю будзе змешчана ў № 4 часопіса «Наша вера»).
Ужо ў тых словах, якія вынесены ў загаловак і задаюць асноўны кірунак разважанням арцыбіскупа, пазначаны шлях, на якім сапраўды можна знайсці і захаваць надзею.
«Божае Нараджэнне — гэта свята, якое аб’ядноўвае і стварае атмасферу даверу», — піша ксёндз доктар Юрый Дрозд у артыкуле «З гісторыі свята Божага Нараджэння». Як становіцца зразумела з яго падрабязнага гістарычнага экскурсу, далёка не адразу ў хрысціянстве гэтае свята мела такія багатыя традыцыі, якія дазвалялі адчуць яго цёплую атмасферу. Час літургічнага святкавання, увядзенне ў хрысціянскую гісторыю постацяў трох мудрацоў, развіццё культу Дзіцяткі Езуса — гэтыя і іншыя няпростыя пытанні закранае святар у сваім артыкуле.
«Ці дазваляецца ў Касцёле сужэнства з некатолікамі?» — так называецца матэрыял ксяндза Кірыла Бардонава ў рубрыцы «Старонка касцёльнага суддзі», дзе аўтар распавядае пра тое, якія цяжкасці могуць чакаць сужэнцаў з рознай канфесійнай прыналежнасцю.
Аднак, нягледзячы на ўсе жыццёвыя цяжкасці, «любоў дае нам надзею, а надзея дазваляе жыць любоўю», як піша ксёндз Ян Твардоўскі ў падборцы кароткіх празаічных твораў на старонках часопіса.
Пра каштоўнасць надзеі разважаюць таксама Іна Бігель, маладыя людзі і падлеткі ў інтэрв’ю Паліны Грыб, паэтка Данута Бічэль у вершы «Надзея».
Цікавыя і змястоўныя матэрыялы прапануюць святары, якія вядуць пастаянныя рубрыкі: ксёндз Андрэй Рылка («Святар адказвае на пытанне»), ксёндз Юрый Кулай («Школа малітвы»), а таксама пастаянныя аўтары Галіна Калевіч і Віктар Ведзень.
На вокладцы часопіса чытачы знойдуць «Навэнну да Дзіцяткі Езуса» з літаніяй і малітвамі на кожны дзень навэнны
