Дзень пачаўся з катэхезы ў парафіі Максімільяна Кольбэ, якую праводзіў біскуп Віцебскі Алег Буткевіч, а затым пайшлі хвіліны чакання сустрэчы са Святым Айцом. Мне найперш хацелася пачуць тое, што Папа скажа ў гэты дзень.
Калісьці я была ў такім жа радасным чаканні перад Імшой, на якой гамілію павінен быў прамаўляць папярэдні Апостальскі Нунцый у Беларусі арцыбіскуп Клаўдыё Гуджэроцці. У гэтым выпадку штосьці падобнае.
Толькі аўдыторыя ў разы-разы большая, і ў гэтай аўдыторыі дыхае, віруе маладосць. У чаканні моладзь спявае, танчыць, абменьваецца маленькімі сувенірамі.
Яшчэ раніцай біскуп Алег Буткевіч, які сапраўды прыклад для многіх з нас, прынамсі для мяне асабіста, заклікаў моладзь памятаць, што менавіта маладосць — час, калі можна шмат зрабіць.
І Папа Францішак у сваёй прамове да ўдзельнікаў СДМ сказаў, што найбольш засмучаны, калі бачыць моладзь, якая па сваёй сутнасці падобная ўжо да пенсіянераў. Моладзь, якая не марыць і нічога не шукае, якая адступае, яшчэ не пачаўшы.
У моладзі ж, па словах Пантыфіка, павінна быць шмат сіл, шмат мараў і надзей, бо навошта тады вера?
Таксама Папа падкрэсліў, як важна выйсці з зоны ўнутранага камфорту, бо толькі па-за ёй можна сустрэцца з Міласэрнасцю. Святы Айцец заклікаў прысутных не баяцца змяніць ход падзей.
Яшчэ адной рэччу, якая мяне вельмі захапіла і ўразіла як удзельніка СДМ 2016, які стаяў у натоўпе на палях у чаканні прыезду Папы на Блонях, было тое, што Еўропа была прадстаўлена на беларускай мове. Для мяне гэта вельмі важна, бо праз такі жэст я адчула, што нашу краіну прымаюць як краіну еўрапейскую, як адну з дачок і братоў, як краіну, якая мае сваё годнае імя і аблічча на сусветнай карце.
Папярэднія матэрыялы:
Дзённік удзельніка СДМ-2016: ад заплечніка да першых сустрэч і ўсмешак
Дзённік удзельніка СДМ-2016: міласэрнасць чалавека да чалавека
Дзённік удзельніка СДМ-2016: да кульмінацыі ўсё бліжэй
Дзённік удзельніка СДМ-2016: цяпер я нашу пры сабе тры важныя рэчы — тры гімны
Дзённік удзельніка СДМ-2016: Кракаў жыве!
Дзённік удзельніка СДМ-2016: Блоні — што далоні Бога, на якіх радуюцца Яго дзеці
Дзённік удзельніка СДМ-2016: дзе малітва і Эўхарыстыя — там паўната еднасці
