30 кастрычніка ў горадзе Баранавічы (Пінская дыяцэзія) сёстры місіянеркі Святой Сям’і разам з вернікамі парафіі Маці Божай Фацімскай арганізавалі мерапрыемства на Шосты дзень бедных.
Яно стала адказам на заклік Папы Францішка ў чарговы раз паразважаць над таямніцай убогага Хрыста, які прыходзіць да нас у асобе беднага чалавека.
У сваім сёлетнім пасланні з гэтай нагоды Святы Айцец звяртае ўвагу на тое, што перад убогім чалавекам не трэба практыкавацца ў красамоўстве, але варта закасаць рукавы і ўзяцца за працу.
Акурат гэта і зрабілі сёстры з баранавіцкай супольнасці місіянерак і парафіяне.
Мерапрыемства распачалося ўрачыстай святой Імшой з удзелам бедных. Пасля цэлебрацыі ўсе, хто прыйшоў на свята, сабраліся каля кляштара сясцёр місіянерак Святой Сям’і, дзе іх чакаў пачастунак. Атмасферу радасці дапамагла стварыць творчасць народнага эксперыментальнага ансамбля «Берагіня» з вёскі Дарава.
«Няхай час, праведзены разам з беднымі, вучыць нас з радасцю дзяліцца тым, што маем, з кожным чалавекам», — выказваюць пажаданне сёстры місіянеркі.
