8 кастрычніка ў мястэчку Іказнь (Віцебская дыяцэзія, Браслаўскі дэканат) адзначылі традыцыйны фэст у гонар Маці Божай Ружанцовай і 110-ю гадавіну з часу пабудовы тут касцёла Божага Цела.
Распачалася парафіяльная ўрачыстасць святой Імшой, цэлебрацыю якой узначаліў біскуп Віцебскі Алег Буткевіч.
Разам з іерархам і мясцовымі вернікамі на чале з пробашчам, ксяндзом Юрыем Жаўняровічам, маліліся дэкан Браслаўскі ксёндз Станіслаў Мжыглуд SDS, ксёндз Ян Пугачоў з Германавічаў, ксёндз Славамір Самковіч з Пагошча і ксёндз Іван Кароткін з Наваполацка.
У гэты сонечны восеньскі дзень у Іказні сабралася шмат гасцей, былі нават пілігрымы з Мінска.
На заканчэнне святой Імшы адбылася Эўхарыстычная працэсія, пасля чаго біскуп Буткевіч павіншаваў іказненскіх вернікаў з падвойным святам і ўручыў ганаровыя граматы дзвюм актыўным парафіянкам. Узнагароды з рук іерарха атрымалі Ірына Жойдзь, старшыня парафіяльнай рады, якая вядзе бухгалтарскія і фінансавыя справы парафіі, а таксама Часлава Запрагаева, якая адчыняе касцёл, прыбірае, упрыгожвае, клапоціцца пра прылеглую тэрыторыю, сустракае ў святыні пілігрымаў і турыстаў.
Урачыстасць у Іказні прыгожым спевам аздобіў хор з Браслава пад кіраўніцтвам арганісткі Іны Сапун. Сястра эўхарыстка са Слабодкі Ірэна Сапун дапамагала ў арганізацыі фэста, упрыгожванні касцёла і прымала ўдзел ў падрыхтоўцы да працэсіі.
Напрыканцы перад сабранымі перад святыняй выступіў народны ансамбль «Сябрына» з Ахрэмаўцаў. Тут ужо спявалі і скакалі ўсе, а гасцінныя іказненскія парафіяне шчодра частавалі гасцей вухой, хатнімі прысмакамі і смачым морсам.
Іказнь — гэта невялікае мястэчка на Браслаўшчыне з вялікай гісторыяй. Першы пісьмовы ўспамін датуецца 1499 годам, калі гэтыя землі набыў сакратар караля Аляксандра Ян Сапега. Па меркаванні гісторыкаў, парафія ў Іказні была заснавана яшчэ раней. Валадар Іказні Ян Сапега ў 1501 годзе атрымаў ад Папы Аляксандра VI дазвол на будаўніцтва парафіяльнага касцёла пад тытулам Святога Духа.
На месцы сённяшняга касцёла было некалькі драўляных святынь, адна з іх была ўзведзена паводле фундацыйнай граматы выдатнага дзяржаўнага дзеяча, канцлера Вялікага Княства Літоўскага Льва Сапегі.
У 1906 годзе быў атрыманы дазвол на ўзвядзенне мураванага касцёла і 17 верасня 1912 года будаўніцтва святыні завяршылася. У часы пераследу (1948–1990 гг.) касцёл зачынілі. Ён быў моцна разбураны, бо выкарыстоўваўся як збожжасховішча і склад будаўнічых матэрыялаў.
У 1989 годзе ў Іказні была ўтворана і зарэгістравана парафія Божага Цела, але дазвол на карыстанне святыняй быў атрыманы толькі 7 кастрычніка 1990 года. Сённяшні парафія ў Іказні налічвае ўсяго крыху больш за сотню вернікаў.
