У нядзелю 11 верасня супольнасць руху «Маці ў малітве», якая дзейнічае пры парафіі Нараджэння Маці Божай у Браславе, адзначыла 20-годдзе з часу заснавання.
Як адзначаецца на сайце браслаўскага санктуарыя Маці Божай Валадаркі Азёраў Waladarka.by, у свеце гэты малітоўны рух жанчын існуе 27 гадоў, 21 год у Беларусі і ўжо 20 гадоў у Браславе.
Святая Імша аб’яднала прысутных малітвай падзякі за маці і ўдзельніц гэтага руху, якія сабраліся разам з многіх куткоў Віцебскай дыяцэзіі: Паставаў, Камаяў, Лынтупаў, Лучая, Відзаў, Глыбокага, Верхнядзвінска, Далёкіх, Шаркаўшчыны, Пагошчы і з віцебскіх парафій святой Барбары і святога Антонія.
Прысутнічала таксама каардынатар і пачынальніца дзейнасці руху ў Беларусі Людміла Губіна з Мінска.
З гэтай нагоды святую Імшу ў браслаўскім касцёле ўзначаліў біскуп Віцебскі Алег Буткевіч. На пачатку гаміліі іерарх павіншаваў удзельніц руху з такой прыгожай датай.
«Малітва за дзяцей, за новае пакаленне — гэта вельмі важная справа, бо праблемы ў сем’ях, якія цяпер перажываем, з’яўляюцца наступствам часоў атэізму, бязвер’я трох пакаленняў. Таму салідарнасць, супольная малітва маці вельмі важная, як важны і ўласны прыклад жыцця», — падкрэсліў пастыр Віцебскай дыяцэзіі і кіраўнік беларускага каталіцкага епіскапату.
Іерарх дадаў, што «ў Браславе маці яднаюць сваю малітву з малітвай Найсвяцейшай Панны — той, якая, хоць і была пазбаўлена праблем, выкліканых першародным грахом, але многае перажывала разам са сваім Сынам: яго пакуты, адносіны іншых».
На заканчэнне біскуп Алег Буткевіч заўважыў, што, «хоць усе мы часам з’яўляемся заблукалымі авечкамі, але разам з тым можам маліцца за іншых, што і маем рабіць».
Пасля Эўхарыстыі ўдзельніц руху чакаў абед у парафіяльным доме імя айца Францішка Ярдана. Пры стале жанчыны дзяліліся сваімі радасцямі і смуткамі, якія даводзіцца перажываць кожнай маці, і што нашмат лягчэй рабіць па прыкладу Панны Марыі, у малітве і з даверам да Бога.
