8 верасня, у свята Нараджэння Найсвяцейшай Панны Марыі, вернікі парафіі ў Заслаўі (Мінска-Магілёўская архідыяцэзія, дэканат Мінск-Захад) адзначылі адпустовую ўрачыстасць.
У гэты святочны дзень у сценах адроджанай святыні на чале са сваім пробашчам ксяндзом канонікам Дзмітрыем Пухальскім мясцовыя парафіяне прывіталі шмат гасцей, сярод якіх быў Мітрапаліт Мінска-Магілёўскі арцыбіскуп Юзаф Станеўскі.
Радасць парафіяльнага свята прыехалі падзяліць святары з Мінска, Радашковічаў, Стоўбцаў, Маладзечна, Ракава, а таксама вернікі з гэтых і іншых парафій.
«Бараніць самае дарагое для беларусаў, як князь Ізяслаў бараніў сваю маці Рагнеду. Бараніць веру, мову і годнасць кожнага грамадзяніна Беларусі», — такімі словамі вернікі парафіі Нараджэння Найсвяцейшай Панны Марыі ў Заслаўі віталі арцыбіскупа Станеўскага, падаючы яму хлеб і соль.
На пачатку Імшы ўдзельнікаў урачыстасці прывітаў пробашч парафіі ксёндз канонік Дзмітрый Пухальскі, запрасіўшы арцыбіскупа Станеўскага ўзначаліць цэлебрацыю. Іерарх адзначыў, што ўпершыню знаходзіцца ў заслаўскай святыні, хоць раней ужо бываў у гэтым старадаўнім горадзе.
У прамоўленай гаміліі арцыбіскуп з удзячнасцю ўзгадаў продкаў сённяшніх жыхароў Заслаўя, якія збудавалі тут касцёл.
Іерарх адзначыў важнасць клопату аб святыні сёння, дадаўшы, што такія месцы дапамагаюць вяртацца да свайго і адраджаць у сабе памяць і гонар за мінулае дзеля будучыні.
Напрыканцы Імшы арцыбіскуп благаславіў дзежку з зернем, «каб на нашых сталах заўсёды хапала хлеба і да хлеба», як выказаўся іерарх.
Пасля Імшы адна з мясцовых парафіянак папрасіла арцыпастыра заспяваць вядомую ўкраінскую песню пра ручнік на беларускай мове. Многія вернікі ведаюць, што арцыбіскуп яе вельмі любіць, дзякуючы запісу, зробленаму ў 2019 годзе на фэсце ў Міхалішках.
Арцыбіскуп Юзаф Станеўскі выканаў просьбу, і вернікі падпявалі яму гэтыя шчымлівыя радкі, поўныя суму, але і надзеі:
«Я вярнуся ўжо: не сумуй, дарагая,
прытулі, як тады, калі йшоў я ў свет,
наталі цеплынёй, адары сына дарам спакою
і дазволь да бацькоўскага дому ўвайсці».
