14 жніўня, напярэдадні ўрачыстасці Унебаўзяцця Найсвяцейшай Панны Марыі, або Маці Божай Зельнай, у парафіі святога Казіміра ў Маладзечне пры кляштары братоў капуцынаў прайшоў Мядовы кірмаш 2022.
Правядзенне такіх кірмашоў тут ужо становіцца традыцыяй.
Сёлета на ім можна было набыць мёд розных гатункаў ад мясцовых пчаляроў, садавіну, гародніну, духмяныя травы, каліўё для аптэкарскага агароду.
Ахвотныя маглі таксама пачаставацца дранікамі, салодкай ватай, розным смачным дамашнім печывам, выпіць кавы ці травяной гарбаты з розных зёлак. Акрамя таго, можна было палюбавацца і набыць абразы на тканіне, прыгожа вышытыя ў капуцынскай майстэрні Sacris Vestibus, ладныя кошыкі і розныя іншыя дэкаратыўныя вырабы мясцовых майстроў.
