23 ліпеня у Клецку (Мінска-Магілёўская архідыяцэзія, Нясвіжскі дэканат) адбылася святая Імша падзякі Богу за 10-годдзе з часу пасвячэння ў райцэнтры парафіяльнага касцёла Святой Тройцы.
Узначаліў урачыстую цэлебрацыю Мітрапаліт Мінска-Магілёўскі арцыбіскуп Юзаф Станеўскі. У Эўхарыстыі разам з арцыпастырам бралі ўдзел святары з законніцкай супольнасці Місіянераў Святой Сям’і, якія з 1996 года нясуць служэнне у клецкай парафіі. Да іх далучыліся душпастыры з суседніх парафій, сярод якіх быў дэкан Нясвіжскі ксёндз канонік Пётр Шарко, а таксама мясцовыя вернікі і госці.
Удзельнікі святой Імшы падзякавалі Богу за паспяховую пабудову касцёла і за ўсіх тых, хто сваімі малітвамі і ахвяраваннямі прычыніўся да гэтай высакароднай справы.
Прысутныя асаблівым чынам узгадалі ў сваіх малітвах перадусім былога пробашча клецкай парафіі ксяндза Эрвіна Вячорка MSF. Менавіта дзякуючы руплівай працы гэтага святара з супольнасці Місіянераў Святой сям’і ў Клецку была пабудавана каталіцкая святыня.
Абрад пасвячэння касцёла Святой Тройцы ў Клецку здзейсніў 30 чэрвеня 2012 года тагачасны Мітрапаліт Мінска-Магілёўскі арцыбіскуп Тадэвуш Кандрусевіч. Клецкі касцёл стаў адной з шасці святыняў, пабудаванай у Беларусі намаганнямі святароў з законніцкай супольнасці Місіянераў Святой Сям’і.
