19 чэрвеня, у нядзелю, што прыпадае ў актаве ўрачыстасці Найсвяцейшага Цела і Крыві Хрыста, у Віцебску пасля двухгадовага перапынку, звязанага з пандэміяй каранавірусу, адбылася доўгачаканая Эўхарыстычная працэсія.
Як паведамляе сайт Catholicnews.by, вернікі з усіх парафій абласнога цэнтра, а таксама мясцовыя грэка-католікі сабраліся ў катэдральным касцёле на ўрачыстую Імшу. У гаміліі біскуп Віцебскі Алег Буткевіч зрабіў акцэнт на словах з нядзельнага Евангелля: «А вы кім лічыце Мяне?»
«Божае слова дапаўняе і вельмі моцна падкрэслівае гэтую таямніцу, дзеля якой мы такой шматлікай сям’ёй з віцебскіх парафій сабраліся ў катэдральным касцёле»,— заўважыў іерарх.
Перад пачаткам працэсіі кіраўнік беларускага каталіцкага епіскапату нагадаў пра сэнс гэтага рэлігійнага шэсця:
«Бог з намі, праз нас нясе з сабой ласку благаслаўлення, супакой, надзею. Малітва з’яўляецца аховай ад усялякага зла», — адзначыў біскуп Буткевіч.
Па традыцыі працэсія мела чатыры прыпынкі: адзін каля катэдральнага касцёла, два на вуліцах горада і апошні каля касцёла Святога Духа. На кожным прыпынку чыталіся ўрыўкі з Евангелля і ўзносіліся малітвы. Акрамя ўдзельнікаў працэсіі, на прыпынку спыняліся і выпадковыя мінакі: адны з прычыны простай цікавасці, другія рабілі здымкі на свае смартфоны, трэція пыталіся: «З якім святам звязана мерапрыемства?» Такім чынам адбывалася, у пэўным сэнсе, евангелізацыя сярод гараджан Віцебска.
Біскуп благаслаўляў Найсвяцейшым Сакрамантам, а праз ягоныя рукі сам Бог бласлаўляў жыхароў горада.
Напрыканцы ўрачыстасці пастыр дыяцэзіі выказаў вялікую ўдзячнасць перадусім Пану Богу за магчымасць правядзення працэсіі, а таксама святарам і ўсім вернікам.
Іерарх падзякаваў хору, які сваім спевам упрыгожваў працэсію; прысутным дзецям, якія прынялі ў гэтым годзе Першую Камунію, а таксама ўсім арганізатарам свята: сястры Ёнашы, ксяндзам Валерыю Марціноўскаму і Аляксандру Сапелю, вернікам парафіі Маці Божай Фацімскай з Шуміліна. Словы падзякі прагучалі таксама ў адрас службы парадку і адміністрацыі Першамайскага раёна Віцебска за разуменне і дазвол на правядзенне мерапрыемства.
