13 чэрвеня арцыбіскуп эмерыт Тадэвуш Кандрусевіч наведаў парафію Унебаўзяцця Найсвяцейшай Панны Марыі на сваёй малой радзіме ў Адэльску на Гродзеншчыне, дзе ўзяў удзел у традыцыйным фэсце ў гонар святога Антонія.
Святы Антоній Падуанскі, або Лісабонскі, з’яўляецца адным з самых шанаваных святых у Каталіцкім Касцёле.
У Адэльску вялікай папулярнасцю вернікаў карыстаецца абраз святога, што захоўваецца ў тутэйшай святыні, які вернікі з наваколля называюць «Адэльскім Антоніем».
Ва ўспамін святога, які адзначаецца 13 чэрвеня, у Адэльску адбываецца традыцыйны фэст у яго гонар.
У гэты дзень арцыбіскуп Кандрусевіч узначаліў у адэльскім касцёле цэлебрацыю ўрачыстай святой Імшы. У прамоўленай гаміліі заслужаны іерарх нагадаў асноўныя факты з жыцця святога Антонія, які першапачаткова жадаў быць місіянерам у Афрыцы.
«Замест гэтага Божы Провід зрабіў яго найбольш вядомым прапаведнікам, які пераконваў ерэтыкоў і навяртаў грэшнікаў. Яго прыходзілі слухаць натоўпы людзей», — адзначыў арцыпастыр, дадаўшы, што заступніцтва святога Антонія асабліва просяць у пошуку страчаных рэчаў. «Важна знайсці страчаную рэч. Але значна важнейшая справа адшукання, вяртання страчаных духоўных каштоўнасцяў», — сцвердзіў іерарх.
Ён заўважыў, што святога Антонія на абразах найчасцей малююць з кнігай Евангелля і Дзіцяткам Езусам на руках.
«Такім чынам святы нібы кажа нам засяродзіцца на асобе Езуса — нашага Збаўцы, і на заўсёды актуальным і дзейсным Божым слове, каб знайсці страчаную веру. Святы Антоній вучыў, што ў цемры мы не бачым бруду вакол нас і толькі на святле яго заўважаем. Таму нам неабходна святло Хрыста, каб убачыць наш актуальны духоўны стан з мэтай ачысціць сэрцы», — падкрэсліў арцыбіскуп.
Ён дадаў, што «мы часта губляемся ў жыцці і перажываем крушэнні нашага жыццёвага карабля, але святы Антоні вучыць нас, што дзівосная ласка Божай любові і міласэрнасці прыходзіць да нас і ахінае ў складаныя хвіліны нашага жыцця».
«Таму ў святле вучэння Хрыста і прыкладу святога Антонія кожны дзень нашага жыцця павінен быць напоўнены надзеяй на Божую дапамогу, бо кожны дзень у святле Божага Провіду — гэта дзень новых магчымасцяў», — настаўляў землякоў іерарх.
Сваю гамілію арцыбіскуп Тадэвуш Кандрусевіч завяршыў заклікам: «Святы Антоній, будзь для нас прыкладам жыцця, згоднага з духам Евангелля, дапамажы захаваць веру і дасягнуць святасці, каб прыйсці ў радасць вечнага шчасця ў небе».
