![](/3/images/news/2022/06/14713/2022-06-08-an-AM6-2022.jpg)
Чэрвеньскі нумар часопіса «Ave Maria» цалкам прысвечаны цуду Эўхарыстыі.
Як адзначаецца на сайце выдання ave-maria.by, існуе столькі аспектаў і граняў гэтай надзвычайнай рэальнасці, з якой мы кожны дзень можам сустрэцца, зайшоўшы ў святыню, што разважаць на гэтую тэму можна, бадай што, бясконца.
Каб лепш усвядоміць незвычайнасць гэтага дару, які даецца вернікам, чытачам прапануецца ўрывак з энцыклікі Яна Паўла ІІ Ecclesia de Eucharistia.
Ксёндз доктар Юрый Дрозд у сваім артыкуле распавядае пра гісторыю эўхарыстычнага культу ў Каталіцкім Касцёле.
Айцец Яўген Голуб OFMConv дзеліцца з чытачамі думкамі пра спалучэнне будзённага і звышнатуральнага ў эўхарыстычным хлебе — нашай нябеснай манне, пра цуд, які побач, і таму мы перастаем звяртаць на яго ўвагу.
Ганна Шаўчэнка ўздымае пытанне, нашто знакі і цуды, калі яны не вядуць да жыцця, і дзеліцца сваімі думкамі пра тое, як верніку ўспрымаць цуды і знакі Божай прысутнасці. Тэрэса Клімовіч разважае пра адарацыю Найсвяцейшага Сакрамэнту.
Айцец Юрый Кулай OCD ў рубрыцы «Школа малітвы» заклікае да супрацоўніцтва з Божым лекам Эўхарыстыі.
Шэраг матэрыялаў нумара прысвечаны эўхарыстычным цудам.
У рубрыцы «Святар адказвае на пытанне» ксёндз Андрэй Рылка апавядае, як вучэнне Касцёла тлумачыць эўхарыстычныя цуды. У матэрыялах, падрыхтаваных Інай Бігель, змешчаны сведчанні аб жыцці некаторых святых, якія адрозніваліся асабліваю любоўю да Эўхарыстыі, а таксама апавядаецца гісторыя некалькіх эўхарыстычных цудаў.
Асабістым сведчаннем пра сваё цудоўнае навяртанне і блізкія адносіны з Богам дзеліцца мінчанін Дзмітрый Леановіч у матэрыяле Галіны Калевіч.
Чытачам прапануецца паразважаць на тэму Эўхарыстыі ў містычным досведзе святых і душаў чыстцовых паводле кнігі сястры Анны Чайкоўскай WDC «Чысцец у зямным жыцці», якая нядаўна выйшла ў выдавецтве «Pro Christo».
Віктар Ведзень працягвае распавядяць пра аўтамабільную пілігрымку ўздоўж межаў Беларусі з найбольш шанаванымі абразамі Маці Божай з беларускіх санктуарыяў.
Гэтым разам гаворка пойдзе пра наведванні Чэрвеня, Каралішчавічаў і Гомеля.