18 мая ў Баранавічах прайшоў Пяты адкрыты фестываль мастацтваў «Вясёлка талентаў» для дзяцей з асаблівасцямі псіхафізічнага развіцця, арганізаваны супольнасцю сясцёр місіянерак Святой Сям’і.
Фестываль сабраў маладых і таленавітых артыстаў з Баранавічаў і Баранавіцкага раёна, Ашмян і Пінска, Докшыцкага раёна, Ляхавічаў і Мінска.
Распачалося мрапрыемства з выставы прац удзельнікаў у намінацыях «Жывапіс» і «Дэкаратыўна-прыкладное мастацтва». Выкарыстоўваючы розныя матэрыялы і тэхнікі, юныя мастакі спрабавалі раскрыць асноўную тэму фестываля: «Так нараджаюцца зоркі».
Сапраўдныя сузор’і можна было назіраць і на сцэне фестываля: вершы, спевы, танцы, мелодыі ліліся ад сэрцаў дзяцей да сэрцаў гледачоў.
Радасць усім прынесла таксама неонавае шоу на пачатку фестываля, пацешныя роставыя лялькі, шоў мыльных бурбалак і салодкі пачастунак. Як заўважалі ўдзельнікі, гэта было сапраўднае свята неабмежаваных магчымасцяў і разнастайнасці прадстаўленых талентаў.
