7 мая ў базыліцы святога Міхала Арханёла і святога Станіслава ў Кракаве (Польшча) прынялі пасвячэнне ў ступені дыяканату дзевяць семінарыстаў з манаскага ордэна Святога Паўла Першага Пустэльніка, сярод якіх быў брат Сяргей Калюта з Беларусі.
Як паведаміла прэс-служба Гродзенскай дыяцэзіі, новапасвячаны дыякан паходзіць з парафіі святога Вацлава ў Ваўкавыску.
Цэлебрацыю святой Імшы з удяленнем сакрамэнту пасвячэння ўзначаліў дапаможны біскуп Калішскай дыяцэзіі Лукаш Бузун, які таксама належыць да ордэна паўлінаў.
Дыякан Сяргей Калюта нарадзіўся ў 1997 годзе ў Ваўкавыску, там жа ў парафіі святога Вацлава ў 2008 годзе прыняў Першую святую Камунію.
Фармацыю да святарства распачаў у 2015 годзе ў Вышэйшай духоўнай семінарыі ў Гродне.
У 2016 годзе быў прыняты ў ордэн паўлінаў. На заканчэнне навіцыяту 8 верасня 2017 года прынёс першыя часовыя манаскія абяцанні. Вучыцца ў Вышэйшай духоўнай семінарыі айцоў паўлінаў у Кракаве.
25 сакавіка гэтага года, ва ўрачыстасць Звеставання Пана, на Яснай Гары ў Чэнстахове (Польшча) прынёс вечныя манаскія абяцанні выключнага служэння Богу ў ордэне Святога Паўла Першага Пустэльніка.
