Новы нумар газеты Гродзенскай дыяцэзіі «Слова жыцця» выходзіць перад пачаткам мая — месяца, асаблівым чынам прысвечанага ў Касцёле Маці Божай, што знайшло водгук у шэрагу матэрыялаў.
Адкрывае нумар вялікае інтэрв’ю з ксяндзом Станіславам Станеўскім, рэдэмптарыстам. Святар распавядае пра ідэю вандроўкі па Беларусі копій цудадзейных абразоў Маці Божай з Марыйных санктуарыяў нашай краіны, тлумачыць духоўнае значэнне гэтай ініцыятывы.
«Ці будуць сёлета пілігрымкі?» Рэдакцыя звязалася з шэрагам кіраўнікоў пешых пілігрымак і распытала пра планы і стан падрыхтоўкі. Спойлер: пакуль усё неадназначна.
Чаму ў Святым Пісанні ёсць урыўкі якія «дыскрымінуюць» жанчын? Як разумець гэты гістарычна-культурны кантэкст сёння? Тэму раскрывае Кацярына Паўлоўская.
«Як беларускі Касцёл дапамагае Украіне?» На гэтую тэму ідзе гаворка з дырэктарам Дабрачыннага каталіцкага таварыства Caritas Беларусь ксяндзом канонікам Андрэем Аніскевічам.
«Непатрэбны касцёл». Гісторык Андрэй Вашкевіч распавядае пра святыню ў Вялікай Лапеніцы ў Свіслацкім раёне (Гродзенская дыяцэзія).
Як атрымалася, што святыню пабудавалі, але неўзабаве там ужо не было каму маліцца& Зрэшты, гэтак жа застаецца і да сёння.
Традыцыйна напрыканцы нумара разважанні да Слова. Галоўны рэдактар парталу Grodnensis.by і газеты «Слова Жыцця» ксёндз Юрый Марціновіч разважае над аб’яўленнямі Езуса пасля Уваскрасення і складае іх у «дарогу любові». Грэка-каталіцкі святар Андрэй Крот піша пра пачатак абвяшчэння Евангелля сярод язычнікаў. «Хрыстус памёр за ўсіх», — рэзюмуе душпастыр.
Новы нумар газеты «Слова жыцця» можна набыць ва ўсіх парафіях Гродзенскай дыяцэзіі.
