У ноч з 9 на 10 красавіка ў Зембіне (Барысаўскі дэканат, Мінска-Магілёўская архідыяцэзія) абрынулася частка муроў старадаўняга касцёла Унебаўзяцця Найсвяцейшай Панны Марыі.
Каталіцкая парафія ў мястэчку існуе з 1640 года; у 1640–1832 гады тут быў драўляны касцёл і дзейнічаў кляштар дамініканаў. Мураваны касцёл, пабудаваны 1798–1809 гадах у стылі «станіславаўскага класіцызму», у якім захаваліся пэўныя барочныя рысы, быў зачынены бязбожнай савецкай уладай у 1930-я гады і да нашых часоў дайшоў у напаўразбураным стане.
Як паведамляецца на realt.onliner.by, у ноч на Пальмовую нядзелю абрынулася частка бакавой сцяны старадаўняй святыні.
Як відаць на здымках з месца здарэння, пакуль захавалася фігура Маці Божай, усталяваная ў нішы на цэнтральным фасадзе, а таксама буслянка каля крыжа.
Так выглядаў касцёл да нядаўняга часу.
Старшыня Зембінскага сельсавета Людміла Гараднічук паведаміла Onliner, што для ацэнкі становішча помніка і вызначэння дзеянняў па прадухіленні непажаданых наступстваў яго далейшага разбурэння ў мястэчку чакаюць прадстаўнікоў Міністэрства культуры і МНС. Па словах старшыні, доступ да руін касцёла быў закрыты, а сельсавет падтрымліваў парадак усярэдзіне і звонку.
Касцёл у Зембіне ўключаны ў Дзяржаўны спіс гісторыка-культурных каштоўнасцяў Рэспублікі Беларусь.
Між тым сярод мясцовых жыхароў ходзяць чуткі, што фасад святыні плануецца кантралявана абрынуць усярэдзіну, бо, маўляў, пакінуць у цяперашнім стане небяспечна.
