Пошук

28.03.2022 17:31   Паводле: Grodnensis.by / Фота: Аляксей Ціхан / Grodnensis.by

25 сакавіка, ва ўрачыстасць Звеставання Пана, у гродзенскім рэктаральным касцёле Звеставання Найсвяцейшай Панне Марыі (пабрыгіцкі) адзначалася адпустовая ўрачыстасць, у якой узяў удзел Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч.

Як паведамляе Grodnensis.by, на адпустовай cвятой Імшы прысутнічалі жыхары горада, мясцовае духавенства і студэнты Міждыяцэзіяльнай вышэйшай духоўнай семінарыі ў Гродне.

Урачыстасць Звеставання ў Касцёле традыцыйна з’яўляецца таксама святам кансэкраваных асоб, якое адзначала і супольнасць правінцыйнага законнага дома Кангрэгацыi Сясцёр Найсвяцейшай Сям’і з Назарэта ў Гродне, што размяшчаецца побач са старадаўняй святыняй. Шматлікія сёстры гэтай супольнасці таксама ўдзельнічалі ў Эўхарыстыі.

Цэлебрацыю ўзначаліў біскуп Алег Буткевіч, разам з якім Імшу канцэлебравалі біскуп Гродзенскі Аляксандр Кашкевіч i святары.

Вітаючы прысутных, рэктар пабрыгіцкага касцёла ксёндз канонік Антоні Грэмза адзначыў, што ўрачыстасць, у якой успамінаецца таямніца Уцелаўлення Божага Сына, адносіцца да найстарэйшых і самых важных у Каталіцкім Касцёле, і заахвоціў да супольнай малітвы.

У гаміліі біскуп Буткевіч, кажучы пра таямніцу гэтага дня, разважаў аб каштоўнасці жыцця, якое з’яўляецца вялікім дарам Бога. Па словах іерарха, асабліва ў сённяшні складаны час, калі, найперш для нашага братняга народа ва Украіне, так не хапае супакою і еднасці, трэба цаніць кожную хвіліну жыцця і дзякаваць Богу за ўсе даброты і міласэрнасць.

Біскуп Віцебскі заахвоціў у час Вялікага посту не шукаць вінаватых у адсутнасці міру ў свеце, а перш за ўсё зірнуць на сваё жыццё, бо ад кожнага чалавека ў вялікай ступені залежыць тое, якім будзе свет і яго заўтрашні дзень.

На гэтай Імшы ў дзень даручэння Беззаганнаму Сэрцу Найсвяцейшай Панны Марыі Украіны і Расіі асаблівым чынам маліліся аб міры ва ўсім свеце. На заканчэнне літургіі біскуп Буткевіч благаславіў дзве нядаўна зробленыя фігуры: святога Аўгустына, біскупа, і святога Грыгорыя, папы. Новыя фігуры былі змешчаны ў галоўным алтары, пабудаваным некалькі гадоў таму.

 

Абноўлена 28.03.2022 17:43
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа