У другой палове дня 15 лютага адбылася сустрэча прадстаўнікоў Каталіцкага Касцёла ў Беларусі са Старшынёй Мінскага абласнога выканаўчага камітэта Аляксандрам Турчыным.
У сустрэчы з кіраўніком сталічнага рэгіёна ўзялі ўдзел Апостальскі нунцый у Рэспубліцы Беларусь арцыбіскуп Антэ Ёзіч, мітрапаліт Мінска-Магілёўскай архідыяцэзіі арцыбіскуп Юзаф Станеўскі і пробашч парафіі святога Казіміра ў Стоўбцах ксёндз канонік Ігар Лашук.
Пра вынікі сустрэчы нунцый Ёзіч распавёў БелТА.
«Сёння быў мой першы візіт да Старшыні Мінскага абласнога выканаўчага камітэта. Мы абмеркавалі шэраг пытанняў, у тым ліку касцёлы ў Стоўбцах і Будславе.
Святыня ў Будславе важная не толькі для нас, але і для ўсёй Беларусі. Абмеркаванне яго аднаўлення пасля пажару было адной з тэм нашай сустрэчы.
Яшчэ адна мэта майго візіту <…> — абмеркаванне [магчымай] кананізацыі манаха дамініканіна Фабіяна Малішоўскага», — паведаміў прадстаўнік Папы Францішка ў нашай краіне.
У аблвыканкаме ён таксама распавёў, на якім этапе знаходзіцца праект аднаўлення касцёла, рэалізацыя якога зойме працяглы час і будзе патрабаваць вялікіх сродкаў.
«Што датычыцца Будслава, то цяпер ідзе падрыхтоўка праекту адбудовы касцёла пасля пажару. Святыня знаходзіцца ў вартым жалю стане. Вельмі моцна пацярпелі і роспісы, і дах, таму распачаць рамонт без гатовага праекту па аднаўленні немагчыма. Можна сказаць, што ў адбудове зацікаўлены многія ўстановы. Мы шукаем будаўнічыя арганізацыі, гатовыя выканаць такую няпростую працу.
Само аднаўленне можа заняць нямала часу, таму што трэба аднавіць не толькі фасад, але і роспісы», — падкрэсліў Апостальскі нунцый.
Прадстаўнік Святога Айца выказаў надзею на тое, што гэтая сустрэча са Старшынёй Мінскага аблвыкакама дасць пачатак працягламу і плённаму супрацоўніцтву.
«Наша сустрэча — толькі пачатак супрацоўніцтва. Яно пойдзе на карысць не толькі Касцёлу або Мінаблвыканкаму, але і ўсяму беларускаму народу. Сёлета мы будзем адзначаць 30 гадоў [з часу ўсталявання дыпламатычных] адносін паміж Ватыканам і Беларуссю.
Нас цікавіць перспектыва развіцця дыялогу, згоды, міру. Цяпер у гэтым маюць патрэбу многія краіны. І нашая задача — развіваць гэты кірунак», — сцвердзіў Апостальскі нунцый Антэ Ёзіч.
Аляксандр Турчын, са свайго боку каментуючы сустрэчу з прадстаўнікамі Касцёла карэспандэнту БелТА, зазначыў, што Будслаў у перспектыве можа стаць цэнтрам рэлігійнага турызму ў сталічным рэгіёне.
«На тэрыторыі Мінскай вобласці ёсць, на маю думку, такі знакавы для ўсёй краіны аб’ект, як будслаўскі касцёл. Яшчэ ў 2012 годзе мы ўкладалі немалыя грошы ў рамонт гэтага архітэктурнага помніка.
Сёння мы з нунцыем абмяркоўвалі не толькі пытанні захавання касцёла, але і саму перспектыву зрабіць Будслаў магчымым цэнтрам турызму ў Мінскай вобласці. Мы дамовіліся ў бліжэйшы час з’ездзіць туды, каб разумець, у якім кірунку рухацца», — сказаў старшыня Мінаблвыканкама.
Паводле яго, адносіны дзяржавы, Мінскага абласнога выканаўчага камітэта з Касцёлам пазітыўныя. «Я веру, што мы можам прынесці адно аднаму шмат карысці. Адно з першых запланаваных намі мерапрыемстваў — перанос парэштак Фадіяна Малішоўскага ў касцёл у Стоўбцах. Гэта значная падзея як для Мінскай вобласці, так і для вернікаў усёй Беларусі», — падкрэсліў Аляксандр Турчын.
Як выглядае Нацыянальны санктуарый Маці Божай Будслаўскай сёння — у спецыяльным фотарэпартажы Віталія Палінеўскага.
