20 студзеня па даручэнні Мітрапаліта Мінска-Магілёўскага арцыбіскупа Юзафа Станеўскага ксёндз канонік Францішак Рудзь узяў удзел у юбілейнай каляднай вечарыне, прысвечанай 25-годдзю Хрысціянскага адукацыйнага цэнтра імя святых Мяфодзія і Кірыла.
Мерапрыемства прайшло ў вялікай зале Беларускай дзяржаўнай філармоніі. У ім бралі ўдзел прадстаўнікі органаў дзяржаўнага кіравання Рэспублікі Беларусь, дыпламатычнага корпусу, рэктары ВНУ і кіраўнікі грамадскіх аб’яднанняў і ўстаноў адукацыі горада Мінска.
Са сцэны філармоніі ксёндз канонік зачытаў віншавальны адрас ад імя арцыбіскупа Станеўскага Хрысціянскаму адукацыйнаму цэнтру.
У ім іерарх падкрэсліў ролю хрысціянства ў адукацыі, вялікую асветніцкую і метадычную працу ўстановы, адзначыў яе ўнёсак у хрысціянскую асвету ў нашай краіне.
На працягу ўжо больш як 20-і гадоў асноўнай мэтай Хрысціянскага адукацыйнага цэнтра з’яўляецца сумесная рэалізацыя царкоўна-дзяржаўных, эканамічных, сацыяльных, культурных і рэлігійных ініцыятыў на тэрыторыі Беларусі і за мяжой. Цэнтр аб’ядноўвае святароў і свецкіх, прадстаўнікоў культурнай і навуковай грамадскасці, кіраўнікоў і супрацоўнікаў устаноў адукацыі і аховы здароўя, вытворчых прадпрыемстваў.
На вечарыне прагучалі ўспаміны пра спачылага Мітрапаліта Філарэта, заснавальніка і першага кіраўніка Хрысціянскага адукацыйнага цэнтра.
Завяршылася калядная вечарына канцэртнай праграмай.
