7–8 студзеня ў Навагрудку пры касцёле святога Міхала Арханёла адбываліся курсы «Акадэмія трубы» для моладзі з музычным талентам.
Курсы правёў Аляксандр Ахрэмка, лаўрэат міжнародных конкурсаў, саліст аркестра «Tiroler Fiestspiele Erl Orchestra» з Аўстрыі.
«Акадэмію трубы», якая праводзіцца ў Беларусі ўжо не першы раз (звычайна пры каталіцкіх парафіях у розных мясцінах), ладзяць кваліфікаваныя музыкі на чале з галоўным арганізатарам Аляксандрам Ахрэмкам.
Мерапрыемства традыцыйна складаецца з дзвюх частак: заняткі і канцэрт. Арганна-інструментыльны калядны канцэрт адбыўся 8 студзеня і сабраў большую, чым чакалі арганізатары, колькасць слухачоў.
У канцэрце выступілі Калініка Мядзведзева (арган, клавесін), канцэртуючая арганістка і выкладчык Мінскага дзяржаўнага музычнага каледжа імя Глінкі, Аляксандр Бурдзялёў (клавесін), вышэйзгаданы Аляксандр Ахрэмка і ўдзельнікі «Акадэміі трубы» Аляксандр Барташэвіч, Аляксей Троцкі, Ян Міхалюк і Вадзім Ладынін.
У праграме канцэрта гучалі музычныя творы К. Монтэвердзі, Дж. Кларка, Ё.С. Баха, Дж. Тарціні, Г. Ф. Гендэля, Дж. Тарэллі і іншых сусветна вядомых кампазітараў.
