16 снежня супольнасць падрыхтоўчага курса Міждыяцэзіяльнай духоўнай семінарыi, як адна вялікая сям’я, на чале з Мітрапалітам Мінска-Магілёўскім арцыбіскуп Юзафам Станеўскім сабралася на аплаткавую сустрэчу ў семінарыйнай сталоўцы.
Семінарысты падрыхтавалі невялікую праграму, падчас якой праз вершы і апавяданні наблізілі традыцыі і сэнс Божага Нараджэння.
Нарэшце духоўны айцец першакурснікаў ксёндз Алег Пятрашка прачытаў урывак з Евангелля аб нараджэнні Езуса, а арцыбіскуп Юзаф Станеўскi благаславіў аплаткі.
Дзелячыся гэтым белым хлебам, які на ўзор Эўхарыстыі азначае еднасць усіх ахрышчаных у Хрысце, прысутныя выказвалі адзін аднаму віншаванні і цёплыя, шчырыя пажаданні.
Потым удзельнікі сустрэчы селі за вігілійны стол, на якім прысутнічалі толькі традыцыйныя посныя стравы. Святочны настрой падтрымлівалі спевам калядных песень, у якіх гучыць радасць ад прыйсця ў свет Божага Сына.
Вечар завяршыўся благаслаўленнем, якое ўдзяліў усёй супольнасці арцыбіскуп Станеўскі.
Аплаткавая вечарана, якая адбывалася незадоўга да ўрачыстасці Божага Нараджэння, прычынілася да будавання моцнага духу супольнасці і дапамагла тым, хто робіць першыя крокі на шляху падрыхтоўкі да святарства, адчуць сябе сапраўднымі членамі вялікай семінарыйнай сям’і.
