13 лістапада ў Карэлічах (Гродзенская дыяцэзія) у мясцовы касцёл Маці Божай Нястомнай Дапамогі былі ўрачыста ўнесены рэліквіі благаслаўлёнай сястры Марыі Стэлы і дзесяці яе паплечніц назарэтанак — мучаніц, якія загінулі ад рук гітлераўцаў.
Ва ўрачыстасці ўзялі ўдзел сёстры з Кангрэгацыі Найсвяцешай Сям’і з Назарэта на чале з правінцыйнай настаяцельніцай сястрой Філатэяй. Урачыстасць узначаліў біскуп Юрый Касабуцкі, Генеральны вікарый Мінска-Магілёўскай архідыяцэзіі, нядаўна абраны Генеральным сакратаром Канферэнцыі Каталіцкіх Біскупаў у Беларусі.
Святочную радасць з мясцовымі парафіянамі і іх духоўнымі пастырамі з Ордэна святога Паўла, першага пустэльніка, падзялілі шматлікія госці з розных мясцін.
Сёстры назарэтанкі, якія працягваюць на беларускай зямлі высакародную справу благаслаўлёных Марыі Стэлы і паплечніц, перадалі карэліцкай парафіі і яе пробашчу айцу Юрыю Саковічу OSPPE святыя рэліквіі, расказалі пра жыццё і пакутніцкі шлях благаслаўлёных сясцёр мучаніц, якія 1 жніўня 1943 года былі расстраляныя ў Батароўскім лесе каля Навагрудка.
Назарэтанкі ахвяравалі сваё жыццё за 120 чалавек, арыштаваных і асуджаных на смерць, сярод якіх быў святар і бацькі сем’яў.
Рэліквіі благаслаўлёных сясцёр назарэтанак спачываюць у саркафагу ў капліцы навагрудскага фарнага касцёла Перамянення Пана, які быў абвешчаны санктуарыем мучаніц.
Цяпер частку гэтых рэліквій можна будзе ўшанаваць таксама ў касцёле ў Карэлічах.
