19 ліпеня ў будынку Канферэнцыі Каталіцкіх Біскупаў у Беларусі ў Мінску адбыўся першы тур уступнага экзамену для кандыдатаў на першы год навучання ў Вышэйшых духоўных семінарыях у Гродне і Пінску.
Экзаменацыйныя пытанні датычыліся Катэхізісa Каталіцкага Касцёла, жыцця паўсюднага і мясцовага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл.
Акрамя таго, кандыдатам трэба было растлумачыць матывы свайго выбару следаваць за Хрыстом, які кліча іх да працы ў Яго аўчарні ў якасці святароў.
Экзамен прымала экзаменацыйная камісія ў наступным складзе:
- старшыня — біскуп Аляксандр Яшэўскі SDB, старшыня Камісіі Канферэнцыі Каталіцкіх Біскупаў у Беларусі па справах фармацыі семінарыстаў і святароў;
- ксёндз Ян Раманоўскі, прэфект Міждыяцэзіяльнай Вышэйшай духоўнай семінарыі ў Гродне;
- ксёндз Павел Эйсмант, куратар першага курса.
Экзаменацыйная камісія, праінфармаваўшы пра сваё рашэнне біскупа Гродзенскага Аляксандра Кашкевіча, з чыёй дыяцэзіі паходзяць кандыдаты, і атрымаўшы яго благаслаўленне і згоду, паведамляе, што новымі студэнтамі Міждыяцэзіяльнай вышэйшай духоўнай семінарыі ў Гродне сталі кандыдаты з Гродзенскай дыяцэзіі:
- Яўгеній Занеўскі (катэдральная парафія святога Францішка Ксавэрыя, Гродна),
- Аляксандр Крыштаповіч (катэдральная парафія святога Францішка Ксавэрыя, Гродна),
- Міхаіл Радзіон (парафія Святой Тройцы, Рось).
Другі тур уступнага экзамену на першы курс Вышэйшых духоўных семінарый у Гродне і Пінску адбудзецца ў будынку ККББ у Мінску 9 жніўня бягучага года.
Адказныя за фармацыю будучых святароў у нашай краіне просяць усіх людзей добрай волі аб малітве ў інтэнцыі новых семінарыстаў, а таксама аб новых і святых пакліканнях да святарства.
