11 ліпеня ў межах сёлетніх урачыстасцяў у санктуарыі Гродзенскай дыяцэзіі Маці Божай Каралевы нашых сем’яў адбылося аднаўленне сужэнскіх абяцанняў. Прыгожую цырымонію ўзначаліў біскуп Юзаф Станеўскі.
Як паведамляе Grodnensis.by, нанава прынесці адно аднаму прысягу любові, вернасці, павагі і жыцця разам ажно да смерці ў згодзе i еднасці сабралося шмат пар, сярод якіх былі як маладыя, так і тыя, якія разам ужо дзясяткі гадоў.
Магчыма, найстарэйшай парай, якая сёлета аднавіла сужэнскія абяцанні ў дыяцэзіяльным санктуарыі Маці Божай Каралевы нашых сем’яў, былі Тадэвуш і Ганна, якія дзякавалі за 59 гадоў жыцця ў шлюбе.
Са словам да прысутных звярнуўся Генеральны вікарый Мінска-Магілёўскай архідыяцэзіі біскуп Юрый Касабуцкі. Іерарх пажадаў сужэнцам і надалей імкнуцца разам да святасці, мужна праходзіць праз цяжкасці, якія сустракаюцца на іх шляху, i супольна перамагаць усе спакусы.
На заканчэнне біскуп Станеўскі прапанаваў сужэнцам, якія аднавілі абяцанні, дапоўніць абрад пацалункам i запрасіў іх да супольнага танцу, песню падчас якога выканаў сам.
