75 гадоў таму ў Рыме быў выдадзены грэка-каталіцкі малітоўнік на беларускай мове «Божым шляхам»

75 гадоў таму быў выдадзены малітоўнік (ці малíтаўнік, як напісана на вокладцы) «Божым шляхам» на беларускай мове для католікаў усходняга абраду.

Выданне ўбачыла свет у 1946 годзе ў Рыме дзякуючы намаганням вядомага рэлігійнага дзеяча айца Льва Гарошкі. Як адзначаецца на сайце грэка-каталіцкай парафіі святога Праведнага Язэпа Svjazep.org, змест гэтай невялічкай кніжачкі збору малітваў добра адлюстраваў і той час, і самога аўтара, які быў добрым багасловам, знаёмым з беларускай і ўкраінскай грэка-каталіцкімі традыцыямі.

Ён адкрываўся штодзённымі малітвамі па-царкоўнаславянску і па-беларуску, а рэшта кніжкі — толькі па-беларуску: прынагодныя малітвы, караценькі катэхізм, царкоўны спеўнік і нават каляндар з Пасхаліяй. Раздзел прынагодных малітваў — нібы рэха пасляваенных гадоў: тут і малітва за загінулых на вайне, і малітва сіраты, і малітва ў няшчасці, але таксама і малітва за беларускі народ, а таксама малітвы дзеля больш празаічных патрэб: перад ежай, пасля ежы, перад сном і г.д.

Верагодна, што гэта быў першы грэка-каталіцкі малітоўнік на сучаснай беларускай мове. Немагчымае на Бацькаўшчыне, якая знаходзілася пад цяжкім прыгнётам савецкай акупацыі, нашы суайчыннікі рабілі на чужыне.

Значэнне малітоўніка далёка пераўзышло і ягоны малюсенькі фармат (ён лёгка змяшчаўся на далоні), і свой час.

Ён быў першым падручнікам веры на роднай мове для многіх нашых суродзічаў. Ён даў назву бадай найлепшаму рэлігійнаму часопісу беларускай пасляваеннай дыяспары, які айцец леў Гарошка пачаў выдаваць у 1947 годзе.

Малітоўнік «Божым шляхам» пэўным чынам кампенсаваў поўную адсутнасць рэлігійнай літаратуры на роднай мове ў першыя гады пасля перабудовы і нават быў перавыдадзена ў Беларусі на пачатку 90-х гадоў мінулага стагоддзя.

Адсканаваны малітоўнік «Божым шляхам» у электронным фармаце ёсць на Беларускай Палічцы ТУТ>>>