Перад урачыстасцю Маці Божай Будслаўскай, якая ў Нацыянальным санкітуарыі сёлета адзначаецца 2 і 3 ліпеня, на правай вежы базылікі зноў пайшоў гадзіннік XVIII стагоддзя, які боем званоў адлічвае кожную чвэрць гадзіны.
…Нават старэйшыя жыхары мястэчка ўжо не памятаюць, калі спыніліся гэтыя куранты на вежы касцёла. Аднавіць і запусціць механізм старадаўняга вежавага хранометра, якіх у Беларусі захавалася зусім няшмат, планавалася ўжо даўно. Гэтая няпростая і адказная справа была даручана прафесійным рэстаўратарам Аляксандру Петракову, Аляксандру Лагуновічу-Чарапко і Аляксандру Лабусу.
Дослед механізму і праца па яго аднаўленні занялі больш за два гады.
У выніку за некалькі дзён да фэсту куранты на касцёльная вежы, якая, на шчасце, не пацярпела падчас пажару, зноў пачалі адлічваць кожную чвэрць гадзіны.
Для чвэрцяў б’е адзін звон, высокі, для цэлых гадзін — другі, больш глыбокага гучання.
Механізм захаваўся практычна ў некранутым стане, стрэлкі і рымскія лічбы цыферблату таксама арыгінальныя, хоць усталяваныя на новыя картушы.
Адладка гадзінніка яшчэ працягваецца, але яго сімвалічны запуск перад фэстам сведчыць пра тое, што з кожнай хвілінай, з кожным боем курантаў, які разносіцца над мястэчкам удзень і ўначы, набліжаецца час, калі вернікі зноў змогуць увайсці ў зачынены пакуль касцёл і ўшанаваць Маці Божую Будслаўскую ў Яе адноўленым доме.
