У гарачыя летнія дні з 21 па 24 чэрвеня ў кляштары айцоў кармэлітаў босых у Мядзелі праходзілі рэкалекцыі для юнакоў, прысвечаныя распазнанню паклікання.
Каб задумацца над важнымі для кожнага маладога чалавека тэмамі, звязанымі з выбарам далейшага жыццёвага шляху, у духоўных практыкаваннях узялі ўдзел трое юнакоў з кармэліцкіх парафій у Нарачы і Мядзелі.
Час рэкалекцый у мядзельскім Кармэлі быў напоўнены малітвай і канферэнцыямі, працай і адпачынкам. Душы асвяжала малітва і разважанне над Божым словам, а ад спёкі ратавала купанне ў нарачанскіх азёрах.
У цэнтры кожнага рэкалекцыйнага дня была Эўхарыстыя і супольная малітва Літургіі гадзінаў. Падчас змястоўных канферэнцый маладыя людзі з дапамогай духоўнага кіраўніка разважалі над выбарам жыццёвага шляху разам са святым Юзафам. Не засталася без увагі і тэма малітвы ў штодзенным жыцці хрысціяніна.
Падчас рэкалекцый мядзельскую супольнасць кармэлітаў наведаў айцец Пётр Фраштэнга OCD, Рэгіянальны Вікарый кармэлітаў босых у Беларусі. Ён пазнаёміўся з хлопцамі падчас смачнага снедання ў кляштары і заахвоціў іх заўсёды клапаціцца таксама аб духоўнай ежы.
Кожны рэкалекцыйны дзень у мядзельскім Кармэлі заканчваўся адарацыяй Найсвяцейшага Сакрамэнту, які з’яўляецца Хлебам вечнага жыцця.
Рэкалекцыі завяршыліся ва ўрачыстасць Нараджэння святога Яна Хрысціцеля — чалавека, які атрымаў у жыцці пакліканне быць Хрыстовым Папярэднікам і таму побач з Найсвяцейшай Паннай Марыяй з’яўляецца цудоўным узорам і заступнікам для ўсіх пакліканых.
