13 чэрвеня вернікі парафіі Беззаганнага Зачацця Найсвяцейшай Панны Марыі ў Касцяневічах (Вілейскі дэканат) прывіталі новых душпастыраў — пробашча і вікарыя.
Папярэдні касцяневіцкі пробашч ксёндз Пётр Пятрага адышоў у вечнасць 20 кастрычніка мінулага года.
Новым пробашчам парафіі ў Касцяневічах Апостальскі адміністратар sede vacante Мінска-Магілёўскай архідыяцэзіі біскуп Казімір Велікаселец прызначыў ксяндза Віталія Маргунова, адначасова прызначыўшы ў гэтую парафіяльную супольнасць вікарыем ксяндза Аўгуста Калясінскага.
Новапрызначаных душпастыраў урачыста ўвёў на пасаду дэкан Вілейскі ксёндз канонік Аляксандр Барыла. У яго прысутнасці новапрызначаныя пробашч і вікарый прынеслі прысягу і прамовілі вызнанне веры. Акрамя парафіі ў Касцяневічах, святары будуць духоўна апекавацца вернікамі ў Сцешыцах і Іллі.
