29 мая ў цэнтры Caritas Мінска-Магілёўскай архідыяцэзіі ў Ляскоўцы адбылася інтэграцыйная сустрэча для моладзі перад сесіяй і летнімі канікуламі.
На пачатку сустрэчы, у якой узялі ўдзел каля трыццаці чалавек, усіх прысутных прывітаў вікарый мінскай архікатэдральнай парафіі ксёндз Андрэй Бурак і правёў уступную малітву.
Моладзь была падзелена на групы, у кожнай з якіх ішла праца над стварэннем стартапу «Як наша праца (вучоба) можа паслужыць Богу?». Гэта адмысловы праект, паводле якога кожны з каманды робіць нешта на карысць Касцёла згодна са сваімі здольнасцямі і адукацыяй.
Такім чынам удзельнікі ўпэўніліся, што кожны, незалежна ад здольнасцяў, можа рабіць нешта канкрэтнае, каб служыць Касцёлу.
Для адпачынку арганізатарамі былі падрыхтаваны актыўныя гульні: скокі на батуце, гульня ў мяч. Падобна таму, як Езус пасля прапаведавання не адпускаў людзей галоднымі, так і моладзь падсілкавалася прыгатаванымі на агні кілбаскамі.
Сустрэча завяршылася супольнай малітвай, падчас якой удзельнікі дзякавалі Богу за навучальны год, прасілі аб Божым благаслаўленні на надыходзячы перыяд сесіі, маліліся аб аднаўленні святыні ў Будславе, пашкоджанай у выніку пажару 11 мая. Кожны ўдзельнік таксама мог атрымаць індывідуальнае благаслаўленне ў святара.
