8 мая ў парафіяльным касцёле Каралевы Апосталаў пры семінарыі ксяндзоў палатынаў у Алтажэве (Польшча) сакрамэнт пасвячэння ў ступені прэзбітэрату прынялі дыякан Руслан Пецкелюн SAC, які паходзіць з Воранава (Гродзенская дыяцэзія), і яго сабрат Павел Зайцаў SAC з Талачына (Віцебская дыяцэзія).
Як паведамляе сайт Гродзенскай дыяцэзіі Grodnensis.by, прэзбітэрскае пасвячэнне ўдзяліў чатыром дыяканам дапаможны біскуп Варшаўскай архідыяцэзіі Рафал Маркоўскі.
Звяртаючыся да кандыдатаў, біскуп нагадаў, што ў Вячэрніку Хрыстус аб’явіў сваім апосталам новыя запаведзі любові і назваў іх сябрамі, а таксама ўстанавіў Эўхарыстыю.
Правінцыял палатынскай правінцыі Хрыста Валадара кс. Зянон Ганас SAC адзначыў падчас Імшы, што задача святара — падрыхтоўка трону для Найсвяцейшай Тройцы ў душах, адкупленых Крывёю Божага Ягняці.
На працягу жыцця ў родным доме, пастулату, навіцыяту і шасці гадоў семінарыйнай фармацыі новапрэзбітэры старанна рыхтаваліся да таго дня, калі сталі Alter Christus — другім Хрыстом — і пачалі шлях, каб праз святарства быць разам з Езусам назаўсёды.
