21 мая ксёндз канонік Францішак Рудзь як прадстаўнік Касцёла ў Беларусі ўзяў удзел у набажэнстве падзякі і вечарыне духоўнай музыкі, якія прайшлі ў гонар 100-годдзя Беларускага дзяржаўнага ўніверсітэта.
Галоўнай падзеяй вечарыны стала супольная малітва прадстаўнікоў праваслаўнага і каталіцкага духавенства, студэнтаў і супрацоўнікаў універсітэта.
Цэлебрацыю набажэнства ўзначаліў Мітрапаліт Мінскі і Заслаўскі Веніямін, Патрыяршы Экзарх усяе Беларусі, пры ўдзеле пробашча мінскай парафіі Маці Божай Будслаўскай ксяндза Францішка Рудзя. Малітву суправаджаў хор Свята-Духава кафедральнага сабора.
Уладыка Веніямін ў прывітальным слове звярнуўся да вытокаў БДУ, успомніў заснавальніка ўніверсітэта — Уладзіміра Пічэту.
Першы рэктар БДУ, дзякуючы свайму добраму хрысціянскаму выхаванню і светапогляду, здзейсніў істотны прарыў у развіцці першага і галоўнага беларускага ўніверсітэта і айчыннай навукі ў цэлым.
Праваслаўны мітрапаліт падарыў універсітэту юбілейную грамату і ікону прападобнай Еўфрасінні Полацкай. З імем гэтай святой звязана адкрыццё першых адукацыйных устаноў і бібліятэк на нашых землях.
Ксёндз Францішак Рудзь у сваім віншаванні адзначыў, што юбілей універсітэта — гэта вялікая падзея ў жыцці краіны: БДУ стаў вытокам для шэрагу беларускіх ВНУ. Універсітэт славіцца багатай гісторыяй, выдатнымі традыцыямі, многімі пакаленнямі педагогаў і настаўнікаў. Асаблівы ж гонар БДУ — бліскучая плеяда выпускнікоў.
Завяршылася мерапрыемства канцэртам духоўнай музыкі.
